Boknøtta 11. desember 
print Sun 11. Dec 11 11:16

Ei samling kortprosa frå ein kyrkjeekspert. Det kan vel vere ei høveleg boknøtt no i adventstida. Forfattaren debuterte i 1962. Han hadde i alt gjeve ut sju bøker før han kom med denne:

«Tekstane spenner frå underfundig humor til det djupase alvor. Ein mosaikk, der kvar stein høyrer med i biletet, men også skin med eigen glans». «I grenselandet mellom prosa og lyrikk». «Ei sentral rolle spelar forfattarens rettskafne far, som lever ut sin Parkinsons sjukdom, utan å få hjelp av dei medisinane som i dag kan dempe symptoma. På godt og vondt går arvegods vidare til nye ættleder».


Alt dette er sagt om denne vesle boka på 77 sider, som kom ut på Det Norske Samlaget og som forfattaren fekk «Sunnmørsprisen» for. Ho gjev sterke inntrykk, lesaren vil hugse ho lenge.

Eg hadde gleda av å møte han ved fleire høve. Han var ein klok mann med mykje innsikt i faget sitt og høgt respektert for sakprosaen sin. Som skjønnlitterær forfattar skal han heller ikkje gløymast. Om boknøtta her hjelper til med å hugse han, har ho gjort ei god gjerning.

Vi spør etter namnet på forfattaren og tittelen på boka.

Send svaret ditt til tinging@nynorskantikvariat.no  før torsdag 15. desember kl. 10.00. Du kan også sende tekstmelding til 92 82 90 98. Mellom dei som svarer rett vert det trekt eit gåvekort på 250 kroner i Nynorsk Antikvariat.