Boknøtta 8. januar
 
print Man 9. Jan 12 23:22

Vi skal fram til ei lita bok på 80 sider som kom ut på Olaf Norlis Forlag i Kristiania det året Bjørnstjerne Bjørnson fekk Nobelprisen i litteratur. Den fyrste forteljinga i boka er «tittelnovella».

Boka inneheld sju forteljingar, mellom dei «Ole Bull hjelpte meg». Denne byrjar slik: «Det var på hotell Runan i Stockholm. Eg bad ein av tenarane, um eg kunde faa meg middagsmat. So synte han meg ei bok som dei ymse matrettane stod upprekna i. Men dei hadde framande namn, og difor såg eg mest på prisen; for eg kunde ikkje taka noko som vart altfor dyrt.» I denne stubben møter den norske heimfødingen storsvensken og vert forlegen, men når svensken får vita at nordmannen er «fraa Bergen stift» kjem samtalen inn på Ole Bull og det jamnar seg.

Forfattaren var fødd i Sogn, av yrke var han lærar og skulte både på Vestlandet og på Austlandet. Han var ein stridsmann; kjempa for målsak og for kristendom. Den hardaste striden han stod i var i Vik i Sogn. Den fyrste lærarposten fekk han i ei lita Sunnfjordbygd, der kom han med i ei «vekking» og skipa i 1877 eit misjonslag. I 1957, to år etter at han hadde gått bort, vart han i denne bygda heidra med eit portrett på bedehusveggen. Bilete heng der den dag i dag.

Han fekk eit langt liv; vart 102 år. Det er ofte god snert i tekstane hans, både i sogene og i spelstykka.
Kva er namnet på forfattaren? Kva er tittelen på boka?

Send svaret ditt til tinging@nynorskantikvariat.no innan torsdag 12. januar kl. 10.00 og bli med i trekkinga av eit gåvekort i Nynorsk Antikvariat på 250 kroner. Du kan også sende inn svaret ditt på SMS til 92 82 90 98.