Boknøtta 22. januar 
print Sun 22. Jan 12 12:09

«Ho Ola-Lina hadde ei svart høne». Med denne setninga opnar boka. Utgjevingsåret er 1963. Det eksemplaret eg sit med i handa er 4. opplag 1964, og på forsatsen står det at far min har fått ho «Jola 1964» av ho Gerda.

Eg hugsar boka frå bokhylla heime, der var mange bilete i ho; lokale fiskarar på stranda med dei små båtane sine og med store stygge Grand hotell i Dakar i bakgrunnen. Ein kar som kliv opp i ein palme. Afrikanar med og utan klede, ei kvinne som ber ei bør med kvist på hovudet, elevar og lærarar, misjonærar og heidningar, bambushytter og blekkskur.

Seinare har eg som antikvarbokhandlar møtt boka så og seie over alt. Det blir gjerne slik når ein populær forfattar «treff planken» og ei bok kjem i opplag etter opplag. Ein gong skal ho ut av den heimen ho var i, alternativet er gjerne ein lokal loppemarknad, eller i beste fall eit antikvariat.

Då forfattaren under den andre verdskrigen debuterte med ei bok om dramatiske naturkatastrofar på Vestlandet var han alt ein røynd journalist og pressemann. Han var verkeleg pioner i norsk kringkastingshistorie. NRK engasjerte han alt i 1929 til redaktør for det som seinare vart Programbladet, og før det igjen hadde han vore journalist i «Den 17de mai», nynorskavisa som i si tid hadde like stort opplag som Dagbladet og Arbeiderbladet.

Forfattaren var ein produktiv og mangslungen kar; ein av våre verkeleg store kåsørar den tida vi berre hadde ein radiokanal og kåseriet som sjanger vart verdsett av folk flest.

Eg hadde gleda av å møte han saman med Dagbladveteranen Daniel Liseth, og ein del andre pressefolk, på det romslege kontoret til Liseth og tidsskriftet «Se frem» i Teatergata 1. Sjølv om forfattaren då var ein gamal mann, så hadde han fram til nyleg hatt spalta si i VG. Slagferdig og ram i replikken var han framleis. Det er ikkje for mykje å seie at møtet i Teatergata var festleg.

Men til spørsmålet i Boknøtta. Har ein sett den boktittelen vi skal fram til så vil den sitje klistra. På omslaget sit ei gamal kvinna i ein gyngestol og strikkar. Då treng vi ikkje seie meir.
Vi skal ha namnet på forfattaren og tittelen på boka.

Send løysinga di til tinging@nynorskantikvariat.no innan torsdag 26. januar kl 10.00. Du kan også sende svaret ditt på SMS til 92 82 90 98.