Boknøtta 5. februar 
print Sun 5. Feb 12 10:18

Han er av våre store på så mange vis. Få, om nokon, er meir produktiv som forfattar; eit imponerande forfattarskap, og guten kan i eit par månader til seie at han er i femtiåra.

Alle som har møtt han tykkjer han er ein hyggeleg kar, og han er i motsetnad til somme av romanfigurane sine, slett ikkje brautande, heller litt lun og kledeleg blyg, triveleleg og sympatisk.

Så er han også av godtfolk fødd; med prest til far og bisp til bestefar. I fleire av romanane hans dukkar prestesonen opp, og i ei personleg avisspalte brukar han ikkje vere snau med å referere til slekta si, med same godlynte snert som er så velkjend og vellukka når han skriv bøker; både for store og for små.

Boka vi skal fram til er ikkje hans første, men den vaksenboka hans som først nådde eit stort publikum, mellom anna gjennom Bokklubben Nye Bøker. Ho byrjar med å gi oss «ei fullstendig oversikt over rockens historie i Fusa kommune». Undertittelen på boka er «Historier» og ei av historiene er «Drikke seg passeleg full og ta snøggbåten til Bergen».

I det vi gratulerer forfattaren med den store dagen hans i april, så spør vi etter namnet hans og tittelen på boka.

Du «risikerer» å vinne eit gåvekort på 250 kroner i Nynorsk Antikvariat om du sender svaret ditt til tinging@nynorskantikvariat.no innan torsdag 9. februar klokka 10.00. Du kan også sende svaret ditt  på SMS til 92 82 90 98