Boknøtta 4. mars 
print Sun 4. Mar 12 16:26

Forfattaren vi skal fram til i dag er fødd i 1978 og tittelen på romanen vi spør om er på fem enkle ord. Ein legg merke til denne tittelen, må smake litt på han, sjølvforklarande er han ikkje, men han pirrar leselysta. Boka vart uvanleg godt motteken, ja nærast tiljubla av eit så godt som samla kritikarkorps, ho vart kåra til «årets debutant» og fekk Nynorsk litteraturpris. Øystein Rottem skreiv i Dagbladet: «Debutant med sin helt egen stemme … med sjelden konsekvens ser hun verden fra barnets perspektiv». I Aftenposten skreiv Benedicte Treider: «At tekster gjør vondt, kan også være godt».

Seks år etter debuten kom så ein roman med ein tittel på tre ord; alle med interesse for Tarjei Vesaas sin forfattarskap såg straks at her kom ei bok ein berre måtte lese. Assosiasjonen til ei av dei aller mest kjende og prisløna Vesaas-bøkene var direkte og utildekt.  Stoffet i denne boka til Vesaas fengde forfattaren vår så sterkt at ho også gav seg i kast med ei masteroppgåve i litteraturvitskap om emnet.

Det er noko heilt særskilt med forfattaren vi skal fram til i dag, ho set merket sitt på alt ho gjer. Sjølv hugsar eg ho som ung student og journalist, vi visste at det måtte bli bra, same kva ho gav seg i kast med. Ho gjorde også ein god innsats for Det Norske Bibelselskap i samband med Bibel 2011, som vart lansert sist haust.

Kva heiter forfattaren og kva er tittelen på debutromanen hennar?

Du kan vinne eit gåvekort på 250 kroner i Nynorsk Antikvariat om du sender svaret ditt til tinging@nynorskantikvariat.no innan torsdag 8. mars klokka 10.00. Du kan også sende svaret ditt  på SMS til 92 82 90 98