Boknøtta, palmesundag 1. april 2012 
print Sun 1. Apr 12 19:14

Han er fødd under krigen, så han kunne ikkje vere med i «Nynorsk Salmebok» (1925), heller ikkje er han med i «Norsk salmebok» (1984), men i «Salmer 1997» er han representert med 5 omsette salmar, og i «Salmebok 2008. (Forslag til ny norsk salmebok)» har forfattaren med 3 eigne salmar og 3 som han har sett om.

Forfattaren er sunnmøring og teolog, og har gjeve ut mange bøker; i fleire sjangrar og på minst ti ulike forlag, derav sitt eige som no er i drift på fjerde året.

Han debuterte med ei diktsamling i 1975, og det er vel som lyrikar han har nådd lengst reint litterært, om han også står for god skjønnlitterær prosadikting for både born og vaksne. Også som forskar, førelesar, redaktør og sakprosaforfattar har han sett spor etter seg; tenkt og fått folk til å tenkje sjølve; om samfunn, filosofi og teologi.

Diktsamlinga vi skal fram til i dag er frå 1993, ho har ein original tittel som fører tankane våre til ei særskild «bok» i bibelen. Denne finst i fleire variantar på nynorsk, og av desse er tvillaust Ivar Mortensson-Egnund si omsetjing i «Fyrebelsbibelen» frå 1921 den mest poetiske.

Kva heiter forfattaren? Kva er tittelen på diktsamlinga?

Du kan vinne eit gåvekort på 250 kroner i Nynorsk Antikvariat om du sender svaret ditt til tinging@nynorskantikvariat.no innan torsdag 5. april klokka 10.00. Du kan også sende svaret ditt  på SMS til 92 82 90 98