Nynorsk antikvariat

.
E-post: tinging@nynorskantikvariat.no
www.nynorskantikvariat.no

Boknøtta 10. juni

Han var lærar, forfattar og komponist. Vi skal fram til eit skodespel han skreiv for amatørteater i 1911. Slike spelstykkje var det stor trong for på den tida. Ungdomslaga kringom på bygdene hadde bruk for folkelege komediar som var greie å setje opp. Det var fint om det også var mange mindre roller, så fekk fleire vere med.

I dette tilfelle er det fire vendingar (akter) og heile 15 roller. Her er både bonden, husmora, jordmora, lærarinna og tenestejenta med. Den eldste er ein mann på 60 år, dei yngste; ei jente og ein gut på 25. Handlinga er ei vestlandsbygd i 1880-åra. I «fyrste vendingi» er vi i stova på ein velstandsgard: «Den vanlege vestlandske innbunad: langbord til høgre, benk til veggen og forsete framfyre. Til vinstre fremst eit mindre bord med eit par stolar til; attanfyr der ei dør til eit kammers; stoveglaset er nedanfyr der og attarst ein kokomn. Yver øvste-bordsenden eit bokskaap og yver nedste-bordsenden eit klokkehus. Midt på veggen i attgrunnen er stovedøri.»

Forfattaren skreiv fleire skodespel, og er elles kjend for lærebøker, forteljingar og dikt. Han tonesette ei mengd songar, dirigerte kor og redigerte songbøker og tonesamlingar.
Han var fødd på Sunnmøre, men lengste arbeidsdagen fekk han i Bergen, der han arbeidde som lærar i meir enn femti år. Her kom han også i lag med Henrik Krohn og var med på skipinga av Vestmannalaget i 1868.

For dei som vil lese meir om mannen kan vi tilrå ei bok om han frå 1986.

Kven var denne mannen?
Kva er tittelen på bygdekomedien hans frå 1911?

Send svaret ditt på e-post til tinging@nynorskantikvariat.no innan torsdag 14. juni kl. 10.00. Du kan også sende SMS til 92 82 90 98.  Mellom dei som svarar rett vert det trekt eit gåvekort på 250 kroner i Nynorsk Antikvariat.


http://www.nynorskantikvariat.no/Innhold/S00F52B13-00F52B21
Sun 10. Jun 12 09:09