Boknøtta 3. februar 
print Sun 3. Feb 13 00:00

Han blir gjerne kalla forfattarane sin forfattar. Ja, han er ikkje åleine om det, men når eg også fortel at han er lærar og bur ikkje langt frå der Anders Hovden skreiv «Fagert er landet», så har eg lagt ut eit par ekstra spor. Spor, ja Hovden fekk inspirasjonen til å skrive denne fedrelandssongen då han gjekk på ski langs same innsjøen som ho Birgit Lien til Hellbillies gjekk, derfor bruker eg seie, at «Fagert er landet» på særskilt vis kan kallast «Buskerud sin nasjonalsong».

Forfattaren vi skal fram til debuterte med ei diktsamling i 1977 og er godt plassert i norsk boksoge. Han er fødd i Trøndelag det året Bertrand Arthur William Russell fekk Nobelprisen i litteratur. Trønderen som gjorde austlending av seg, har fått fleire utmerkingar, mellom desse «Nynorsk litteraturpris». Ein trilogi, der første boka kom i 1996 og som han avslutta i 2007 har alt blitt ein klassikar.

Forfattaren har også godt ry på seg som bokmeldar og er ein uvanleg god lesar. Han tek ikkje lett på det, men er ærleg og konstruktiv, slik at både forfattarane og den vanlege lesaren kan lære av dei presise analysane, dei gode observasjonane og den klare formidlinga hans.

Boka vi skal fram til er ei diktbok frå 1992 som byrjar med orda: «Blikket frå ei anna tid, avstanden og suget etter det som var og enda finst fordi du lever og strekker hendene tilbake mot ei rute».

Send svaret ditt til tinging@nynorskantikvariat.no før torsdag 7. februar kl. 10.00. Du kan også sende SMS til 92 82 90 98. Mellom dei som svarer rett vert det trekt eit gåvekort på 250 kroner i Nynorsk Antikvariat.