Boknøtta sundag 26. februar 2017 
print Lør 25. Feb 17 22:21

Han var fødd i Finnmark, men i heile sitt vaksne liv budde han i Trøndelag. Få har hatt fleire forteljingar og dikt på trykk i norske julehefte, og han illustrerte oftast det han sjølv skreiv. Men han laga også teikningar til andre sine bidrag i aviser og blad, og han gav ut eigne bøker og hefte.

Då 37-åringen bokdebuterte som forfattar i 1943, var han alt godt etablert, som biletkunstnar og illustratør. Han skulle leve av skrivinga og teikningane sine, det gjorde at han tok dei oppdraga som baud seg, også under krigen, då styresmaktene hadde ei sterk hand om den redaksjonelle fridomen i ymse blad. Men det er ikkje grunnlag for å hevde at han plasserte seg i nokon «leir» av den grunn.

Han brukte etter kvart to etternamn, helst med bindestrek imellom. Det hadde seg slik at han skøytte til namnet på staden der han budde, til det stutte etternamnet som han hadde med seg frå barndomen av.

Vi spør etter titlane på dei to siste barnebøkene hans, som begge kom ut det året Sara Lidman fekk Nordisk råds litteraturpris.

Send svaret på sms til 92829098 eller på e-post til tinging@nynorskantikvariat.no innan torsdag 2. mars klokka 10.00. Det blir trekt eit gåvekort i Nynorsk Antikvariat på 250 kroner mellom dei som svarer rett.