Boknøtta sundag 19. mars 2017 
print Lør 18. Mar 17 15:18

«Eg minnest han far, eg». Nett det, sa så ofte Anders Hovden. Og eg minnes far min, han «Oddmunds Ola»; Olav Oddm. Kjerland, som han skreiv seg for. Det var «Mammutsal» på Voss, han far sat og las i katalogen. Då såg han ei bok som han berre måtte ha. Ho hadde kome ut nokre år før, som festskrift på 60-årsdagen til forfattaren, den kjende komponisten, og far min sin gode ungdomsven. Boka hadde «Tabula Gratulatoria», men forlaget hadde ikkje nådd fram til far min med invitasjon til å bli med der, det tykte far var leit, han skulle gjerne vore med på nett den lista, til liks med mange andre vener og kjenningar.  

Eg var vel 13-14 år, kunne framleis reise på barnebillett, og vart eg sendt på handel. Eg tok «Hardangerbana» frå Granvin til Voss, og kjøpte boka hos Anders Ullestad i Voss Bokhandel. Eg ser for meg far i korgstolen sin, der han sit og les kvart ordet i boka, som den norske komponisten hadde skrive om sin australske kollega. Han som i åra 1910 til 1914 hadde vore på årlege konsertturnear her i landet, og same kvar i verda han heldt konsertar spelte han stykke av Grieg. Mor hans brukte å vere med han på Noregs-ferdene, og dei høyrde på spelemenn i Bondeungdomslaget og vitja Det Norske Teatret.

I føreordet vert det nemnt at knapt nokon utanlands kunstnar har kjent sterkare band til landet vårt enn han. Av norske forfattarskap var han vel kjend med Ibsen, Bjørnson, Garborg og Vinje. Edvard Grieg skal ha sagt at han aldri hadde møtt nokon som betre forstod han, enda australiaren berre var 25 år då Grieg døydde.

Forfattaren vår hadde også eit nært og godt venskap til mannen han skreiv om. Dei hadde gått i fjellet saman, og dei hadde brevveksla i ei årrekkje. «Ei lita biografisk skisse» seier han om boka, og det kan vere nemning god nok. Ho gjev innsikt og oversyn, og byr på mange artige kommentarar og observasjonar, mellom andre av Hulda Garborg. Boka er også illustrert med ei rekkje interessante bilete.

Vi spør etter namnet på forfattaren og tittelen på boka, som er identisk med namnet på den biograferte.

Send svaret på sms til 92829098 eller på e-post til tinging@nynorskantikvariat.no innan torsdag 23. mars klokka 10.00. Det blir trekt eit gåvekort i Nynorsk Antikvariat på 250 kroner mellom dei som svarer rett.