Boknøtta sundag 29. oktober 2017 
print Lør 28. Okt 17 21:47

Bonden frå Valdres gav ut eit skodespel rett før krigen, men den første romanen hans kom i 1948. Forfattaren er mest kjent for dei historiske romanane sine, men han skreiv også noveller og sakprosa. Ei petit-spalte, som vart ei av dei lengstlevande i norsk presse, kom også ut som bok, og dagboksnotata hans frå tiåret før krigen vart gjeven ut etter at han var død.

Boka vi skal fram til i Boknøtta denne gongen fekk Aschehoug-prisen då ho kom ut, og tre år etter vart ho folkeeige som månadens bok i Den norske Bokklubben. Ho er framleis etterspurd, og lesarane vert ofte sterkt gripne av forteljinga om dei kreftsjuke romkameratane på sjukehuset. Men boka er ikkje dyster, sjølv om alvoret ligg i dagen, og vissa om at livet kan ta slutt i nær framtid er ein realitet. Så er då også forfattaren ein av dei store forteljarane våre, som maktar å gje teksten varme og poetisk kraft; og let humor og ljosstreif kome til.

Vi spør etter namnet på forfattaren og tittelen på romanen.

Send svaret ditt på sms til 92829098 eller på e-post til tinging@nynorskantikvariat.no innan torsdag, den 2.november klokka 10.00. Det blir trekt eit gåvekort i Nynorsk Antikvariat på 250 kroner mellom dei som svarer rett.