Boknøtta sundag 5. november 2017 
print Søn 5. Nov 17 11:18



Då ho i 1991 var delegat til generalforsamlinga i Dei Sameinte nasjonane i New York, hadde ho gått gradene frå kommunestyre og fylkesting, til ho vart vald inn på Stortinget i 1989. Men ho er så mykje meir enn politikar, og framleis er ho engasjert og aktiv, 87 år gamal. Ho er heidra med Kongens fortenestemedalje i gull og heidersmedlemskap i Noregs Mållag.

Det er 50 år sidan ho vart rikskjendis, det var som visesongar, og ikkje minst gjennom «ønskekonserten» i NRK. Men heilt sidan krigen har ho halde på som visesongar, og etter kvart som lyrikar, skribent og kåsør, til glede for dei mange, og til irritasjon for dei ho pirka borti, når ho ville endre samfunnet i den lei ho tykte trongst.

Så vel diskografien, som bibliografien hennar er mangfaldig, og som tradisjonsberar har ho sunge og lese inn over 130 gamle viser, regler og barnesullar for arkivet.

Det er boka om henne, som vi skal fram til i dag. Ho er ført i pennen av ein dugande og allsidig journalist, og kom ut det året Reisa Nasjonalpark vart opna.

Send svaret ditt på sms til 92829098 eller på e-post til tinging@nynorskantikvariat.no innan torsdag, den 9.november klokka 10.00. Det blir trekt eit gåvekort i Nynorsk Antikvariat på 250 kroner mellom dei som svarer rett.