Boknøtta sundag 17. desember 2017 
print Søn 17. Des 17 11:26

Han slo for alvor igjennom med romanen sin frå 1977, som gav han den store prisen året etter. Men han byrja som lyrikar, og det er debutsamlinga hans vi spør etter. Ho kom ut det året då det skjedde så mykje; USA kalla heim ambassadøren sin i Stockholm av di Sverige var kritisk til Vietnamkrigen, det var studentopprør i Paris, Martin Luther King jr. og Robert Kennedy vart myrda i USA, kronprins Harald vart vigd til Sonja Haraldsen i Oslo, Johann Olav Koss vart fødd i Drammen, og i Mexico var det olympiske leikar.

Forfattaren står for ein allsidig produksjon i fleire sjangrar, som har gjeve han ei rekkje prisar, mellom desse Aschehoug-prisen, Gyldendal-prisen, P2-lyttarane sin romanpris og Brage-prisar. Han er også ein av dei som Dag og Tid har laga ei eiga diktar-avis om.

Vi spør etter namnet på forfattaren, og tittelen på debutboka hans.

Send svaret ditt på sms til 92829098 eller på e-post til tinging@nynorskantikvariat.no innan torsdag, den 21. desember klokka 10.00. Det blir trekt eit gåvekort i Nynorsk Antikvariat på 250 kroner mellom dei som svarer rett.