Boknøtta, sundag 20.mai 2018 
print Lør 19. Mai 18 14:48

Ein totning av aller beste sort. Det er ei sann glede å møte han, og dei som har hatt han til sjef kan ikkje rose han nok. Kreativ og dugande i all si gjerd, reflekterande og klår, men slett ikkje brautande. Han er mest kjend som teatersjef, regissør og skodespelar, men han har skreve både dikt og prosa.

Vi kan takke Einar Økland for boknøtt-boka som vi skal fram til denne kvitsunnhelga. Han spurde han forfattaren om kvifor skodespelarar så sjeldan ytra seg offentleg om kunsten sin. Kvifor skreiv dei ikkje i tidsskrift og blad? Sommaren 1979 kom denne boka. Skodespelaren og teatermannen hadde tenkt og formulert somt om emnet i det siste tiåret, no kom det til samla uttrykk i ei lita raud bok på 113 sider.

Når eg blar igjennom boka så stoggar eg både her og der; les både om Racine og Shakespeare, Edvard Drabløs og Tordis Maurstad. Eg ser at mangt har vore prenta før, mellom anna i Arbeiderbladet, i Dagbladet, og i programhefte for ymse oppsetjingar. Men tekstane er ikkje mindre leseverdige av den grunn.

Så spør vi etter namnet på forfattaren og tittelen på boka.

Send svaret ditt til tinging@nynorskantikvariat.no (eller på SMS til 92829098), innan torsdag 24. mai, kl. 10.00. Du er med i trekkinga av eit gåvekort på 250 kroner i Nynorsk Antikvariat om du svarar rett.