Boknøtta nr. 409, sundag 6. januar 2019 
print Lør 5. Jan 19 18:53

Då vi starta Nynorsk Antikvariat i 1989, budde det ein gild forfattar i same huset. Fire år før hadde han gjeve ut den andre barnediktboka si. Titteldiktet finn vi på side 47. Det tek for seg uttrykket til nokon skapningar på to bein ved Middelhavet, og det er denne boka vi skal fram til.

Forfattaren hadde debutert med ei diktsamling i 1951, og prøvd seg i fleire sjangrar, ikkje minst hadde han godt lag med med sjangeren høyrespel. Han laga sju slike for NRK. Han var også ein habil gjendiktar og arbeidde mykje som det.

Av prisane han hausta nemner vi Noregs Mållags barnebokpris, Dagbladprisen og Doblougprisen. To gonger fekk han Melsom-prisen.

Vi spør etter namnet hans, og tittelen på den andre diktboka hans for barn.

Send svaret ditt til tinging@nynorskantikvariat.no (eller send SMS til 92829098), innan torsdag 10. januar kl. 10.00. Du er med i trekkinga av eit gåvekort på 250 kroner i Nynorsk Antikvariat om du svarar rett.