Boknøtt nr 412, sundag 27. januar 2019 
print Sat 26. Jan 19 19:39

Eg hadde ei gild bok då eg var gut. Ho hadde kome ut fredsåret 1945, men det var nok varianten frå året etter, med «justert» tittel eg hadde. I dag er begge mest umogeleg å skaffe i antikvariata. Bokmålsvarianten derimot er det lett å få tak i, og han har kome i fleire utgåver.

Men det er den aller første vi skal fram til. Undertittelen fortel at boka kan vere til glede for både unge og gamle. At forfattaren hentar stoffet frå sin eigen barndom, er det liten tvil om, sjølv om boka ikkje vert rekna mellom hans sjølvbiografiske bøker.

Forfattaren er ein av dei vi reknar med i den norske bokheimen. Ikkje minst utvandrings-romanane hans, som han fekk kritikarprisen for.

Han var ein allsidig forfattar og stod for ein omfattande produksjon i mange sjangrar. Også som lyrikar fekk han vist talentet sitt gjennom originale og viktige verk.

Diktaren vart heidra både med St. Olav og Nynorsk Litteraturpris.

Send svaret ditt til tinging@nynorskantikvariat.no (eller send SMS til 92829098), innan torsdag 31. januar kl. 10.00. Du er med i trekkinga av eit gåvekort på 250 kroner i Nynorsk Antikvariat om du svarar rett.