Nynorsk antikvariat

.
E-post: tinging@nynorskantikvariat.no
www.nynorskantikvariat.no

Boknøtta nr. 439, sundag 11. august 2019

Vi skal til ei bok om ein etterspurd forfattar frå Rogaland. Ein av desse som vi i antikvariata kan prise høgare enn andre, av di det er mange som samlar på bøkene hans. Bøkene vert lesne framleis, og ikkje minst opplesne i godt lag.

Eg møtte tekstane hans første gongen i leseboka på skulen. Forfattaren skreiv fengjande og var morosam. Eg hugsar også at amatørteatergruppa i ungdomslaget sette opp ein liten folkekomedie, som bar namnet hans. Han var god på å skildre «typar», og om skrivinga hans var humoristisk, så låg det gjerne eit alvor under.

Han var berre 14 år då det første diktet hans kom på prent i Stavanger Aftenblad. Debuten hans som lyrikar var ei diktsamling, som kom ut i Stavanger det året Knut Hamsun gav ut Segelfoss by, men året før hadde han gjeve ut eit spelstykke.

Han hadde ein stor bokproduksjon, vi kan telje meir enn seksti titlar. Året før han døydde kom han med ei av dei mest kjende barnebøkene sine. Ho kom i ny illustrert utgåve i 1975.
Forfattaren av boka om den omtykte jærbuen, har skrive om fleire andre forfattarar og viktige bokfolk. Ikkje minst var det eit storverk han kom med i fjor. Då var det ein forlags-pionér han lyfte fram.

Vi spør etter tittelen på boka om forfattaren frå Rogaland og namnet på biografen.

Send svaret ditt til tinging@nynorskantikvariat.no (eller send SMS til 92829098), innan torsdag 15. august kl. 10.00. Du er med i trekkinga av eit gåvekort på 250 kroner i Nynorsk Antikvariat om du svarar rett.



http://www.nynorskantikvariat.no/Innhold/S02065DFD-02065DFF
Sat 10. Aug 19 20:22