BOKNØTTA, NR. 442, 1. SEPTEMBER 2019 
print Sat 31. Aug 19 21:25

Eg hugsar han kom innom Bladstova vår i Oslo med ryggsekken sin, ein ekte Bergans-meis. Det var som han kom beint or skogen, men det gjorde han ikkje, han kom frå Jølster, og skulle på årsmøte i Den Norske Forfatterforening.

Alfred Hauge skreiv i Stavanger Aftenblad etter at den andre boka hans kom ut, at det skulle bli spanande å følgje forfattaren vidare: «Han er ein solid forteljar av den gamle skulen».

Det er nett denne tredjeboka vi skal fram til, handlinga er lagt til slutten av 1700-talet. Ho kom det året då Svenska Akademien gav Astrid Lindgren den «Stora gullmedalj» og Eivind Reinertsen fekk Tarjei Vesaas’ debutantpris.

Odelsguten pakta bort garden sin for å kunne skrive på heiltid. Det vart både romanar og sakprosa, og han skreiv eit bygdeboksverk på heile 1100 sider. Det året då dette var fullført fekk han Kongens fortenestemedalje i sølv.

Vi spør etter namnet på forfattaren, og tittelen på den tredje romanen hans.

Send svaret ditt til tinging@nynorskantikvariat.no (eller send SMS til 92829098), innan torsdag 5. september kl. 10.00. Du er med i trekkinga av eit gåvekort på 250 kroner i Nynorsk Antikvariat om du svarar rett.