Boknøtta nr. 481, sundag 24. mai 2020 
print Sun 24. May 20 19:04

Det meste går det an å samle på, for den som har «gen» eller anlegg for det. Det kan forfattaren av «boknøttboka» i dag prova. Om ei bok, eller noko anna, er ein del av ein serie, då er ekstra stas å samle heilt til serien er komplett. Denne boka er nummer seks i ei serie.

Forfattaren er ein stor samlar, ein viktig diktar, og ein mangfaldig forfattar. Han er heidra meir enn dei fleste og har gjeve namnet til vegen han bur i. Eg har hatt gleda av å kjenna han litt og handla med han i førti år, det vil seie frå han var berre halvparten så gamal (eller ung) som no. Eg gløymer aldri første gongen vi handla, vi samla på dei same «nynorskingane». Han ville gjera bytehandel «for pengar er så utriveleg å handla med», sa han. Dei orda har bite seg fast i minnet mitt. Sidan har eg samla somt til han, som eg har funne i innkomne boksamlingar; brevmerke, bokmerke og anna.

Det er ein kunstnar som skriv om ein annan. Han som boka er om var fødd hundre år før boka kom ut, og han som skreiv ho debuterte med ei lyrikkbok to år før den andre kunstnaren døydde.

Kven skreiv boka, og kva er tittelen?

Send svaret ditt til tinging@nynorskantikvariat.no (eller send SMS til 92829098), innan torsdag 28. mai kl. 10.00. Du er med i trekkinga av eit gåvekort på 250 kroner i Nynorsk Antikvariat om du svarar rett.